దేవాదుల కాలువను ధ్వంసం చేసిన వారిని అరెస్టు చేసి కఠిన చర్యలు తీసుకోవాలి
మరమ్మత్తులు చేపట్టి బచ్చన్నపేట మండలానికి దేవాదుల నీటిని అందించాలి
సంఘటన స్థలాన్ని పరిశీలించిన సర్పంచుల ఫోరం మాజీ మండల అధ్యక్షుడు గంగం సతీష్ రెడ్డి
మన సాక్షి గొంతుక బచ్చన్నపేట మండలం
బచ్చన్నపేట మండలానికి సాగునీరు అందించే దేవాదుల కాలువను ధ్వంసం చేసి నీటిని ఇతర ప్రాంతాలకు తరలించిన వారిపై కఠిన చర్యలు తీసుకోవాలని సర్పంచుల ఫోరం మండల మాజీ అధ్యక్షుడు గంగం సతీష్ రెడ్డి డిమాండ్ చేశారు.కన్నబోయిన గూడెం నుంచి గోపరాజుపల్లి మీదుగా బచ్చన్నపేట మండలానికి వస్తున్న దేవాదుల కాలువను కొందరు ధ్వంసం చేసి, కాలువ ద్వారా రావాల్సిన నీటిని మళ్లించినట్లు ఆయన ఆరోపించారు. దీంతో బచ్చన్నపేట మండలానికి అందాల్సిన దేవాదుల నీటికి ఆటంకం ఏర్పడిందని ఆవేదన వ్యక్తం చేశారు.ఈ మేరకు గంగం సతీష్ రెడ్డి సంఘటన స్థలాన్ని పరిశీలించారు. కాలువ పరిస్థితిని ప్రత్యక్షంగా పరిశీలించిన అనంతరం సంబంధిత అధికారులతో మాట్లాడి సమస్యను వెంటనే పరిష్కరించాలని కోరారు.దేవాదుల కాలువ ద్వారా బచ్చన్నపేట మండలంలోని పలు గ్రామాలకు నీరు అందుతుందని, ప్రస్తుతం వర్షాలు, సాగునీటి అవసరాల దృష్ట్యా ఈ నీరు ఎంతో కీలకమని గంగం సతీష్ రెడ్డి పేర్కొన్నారు. కాలువను ధ్వంసం చేయడం వల్ల నీటి ప్రవాహానికి అంతరాయం ఏర్పడటమే కాకుండా మండలంలోని రైతులు, గ్రామాల ప్రజలు తీవ్రంగా నష్టపోయే పరిస్థితి ఏర్పడుతుందని అన్నారు.కాలువను ధ్వంసం చేసిన వారిని గుర్తించి వెంటనే అరెస్టు చేయాలని, ప్రభుత్వ నీటి వనరులను ధ్వంసం చేసి నీటిని అక్రమంగా మళ్లించడం తీవ్రమైన విషయమని ఆయన అన్నారు. ఇలాంటి ఘటనలు పునరావృతం కాకుండా బాధ్యులపై చట్టపరమైన చర్యలు తీసుకోవాలని డిమాండ్ చేశారు.అదేవిధంగా ధ్వంసమైన దేవాదుల కాలువను తక్షణమే పూడ్చి, మరమ్మతులు చేపట్టి బచ్చన్నపేట మండలానికి రావాల్సిన నీటిని యథావిధిగా అందించాలని కోరారు. కాలువలో నీటి ప్రవాహం పునరుద్ధరించేందుకు అధికారులు అత్యవసర చర్యలు చేపట్టాలని విజ్ఞప్తి చేశారు.దేవాదుల నీరు మండలానికి సక్రమంగా చేరితే బచ్చన్నపేట మండల పరిధిలోని పలు గ్రామాల్లోని చెరువులు నిండే అవకాశం ఉందని గంగం సతీష్ రెడ్డి తెలిపారు. చెరువులు నిండితే భూగర్భ జలాలు పెరగడంతో పాటు రైతులకు సాగునీటి సమస్య కొంతవరకు పరిష్కారమవుతుందని అన్నారు.ప్రభుత్వం కోట్లాది రూపాయలు ఖర్చు చేసి నిర్మించిన సాగునీటి కాలువలను కొందరు వ్యక్తులు ధ్వంసం చేయడం ఎంతమాత్రం సమర్థనీయం కాదని ఆయన అన్నారు. ప్రజల ప్రయోజనాల కోసం నిర్మించిన నీటి కాలువలను కాపాడాల్సిన బాధ్యత అందరిపైనా ఉందన్నారు.బచ్చన్నపేట మండల రైతులు, ప్రజల ప్రయోజనాలను దృష్టిలో ఉంచుకుని అధికారులు వెంటనే స్పందించాలని, ధ్వంసమైన కాలువను పునరుద్ధరించి దేవాదుల నీటిని మండలానికి అందించాలని గంగం సతీష్ రెడ్డి కోరారు. అలాగే కాలువ ధ్వంసానికి పాల్పడిన వ్యక్తులను గుర్తించి వారిపై కఠిన చర్యలు తీసుకోవాలని ఆయన స్పష్టం చేశారు. ఈ కార్యక్రమంలో పలు గ్రామాల రైతులు పాల్గొన్నారు.
